ملا شیرین د یوه پلاوي په مشرۍ د مهمو امنیتي خبرو لپاره اسلام اباد ته رسېدلی
سرچینو افغانستان انټرنشنل ته ویلي، چې د افغان طالبانو دغه لوړپوړی پلاوی له پاکستاني چارواکو سره په مهمو مسلو د خبرو لپاره اسلام اباد ته رسېدلی، چې د تاوتریخوالي د کمولو پر لارو چارو تمرکز کوي.
د کندهار والي ملا شیرین په داسې حال کې د لوړپوړو چارواکو د یوه پلاوي مشري کوي، چې په دې وروستیو کې د تحریک طالبان پاکستان په سر د دواړو خواوو ترمنځ اړیکې ترینګلې شوې دي.
ویل کېږي، چې په دغه پلاوي کې د طالبانو د بهرنیو چارو او کورنیو چارو وزارتونو او همدارنګه د دغې ډلې د استخباراتو د ریاست چارواکي هم برخه لري.
ملا شیرین چې د طالبانو د مشر شیخ هبت الله یو له نږدې باوري کسانو څخه دی، د طالبانو د هغه کمیسون مشر هم دی چې په منظم ډول له پاکستان سره د پولې په اوږدو کې د ستونزو د حل په موخه خبرې کوي.
یوه پاکستاني چارواکي پاکستان ډیلي ورځپاڼې ته ویلي:« پاکستان به په دغو خبرو کې د ټيټيپي د فعالیتونو مسله راپورته کړي او د طالبانو حکومت څخه به زموږ غوښتنه تکرار کړي، چې ټيټيپي او نورو پاکستان ضد ډلو ته پټنځایونه ور نه کړي.»
سرچينې د پاکستان ډيلي ورځپاڼې ته دا هم ويلي، چې تېره مياشت يو افغان پلاوي پاکستان ته سفر کړى و؛ خو دغو خبرو کومه پايله نه درلوده.
پاکستان تل تور پورې کړی، چې په دغه هېواد کې د تاوتریخوالي زیاتوالی افغانانو پورې اړونده ستونزه ده.
دغه هېواد له هر ترهګریز برید وروسته د پړې ګوته افغانستان ته نېولې او ادعا یې کړې، چې ټيټيپي په افغانستان کې پټنځایونه لري؛ خو دا هغه ادعاوې دي، چې طالبانو تل رد کړې دي.
په روانه اونۍ کې د پاکستان د څېړنې او امنیت مطالعاتو مرکز لهخوا خپور شوي کلني امنیتي راپور کې ویل شوي، چې پاکستان په ۲۰۲۳ کال کې د ۷۸۹ ترهګرو بریدونو او د ترهګرۍ ضد عملیاتو څخه په ټولیزه توګه ۱۵۲۴ د تاوتریخوالي اړوند مړینې شاهد دی.
پاکستان د ډسمبر پر ۱۲مه په ډېره اسماعیل خان کې د ۲۳ امنیتي چارواکو له وژل کېدو وروسته د افغانستان د چارو شارژدافیر سردار احمد شکیب احضار کړی و.
د پاکستان امنیتي چارواکو وروسته وویل، افغانان د هغو شپږو ترهګرو په ډله کې وو چې له چاودېدونکو توکو ډکه لارۍ یې د ډرابن په سیمه کې د امنیتي ځواکونو پر پوستې وجنګوله.
