له ۱۲۲ کلونو وروسته د ټیسټ کرېکټ په نړۍ کې تازه ریکارډ

د هند او سویلي افریقا تر منځ د کیپ ټاون ټېسټ لوبې په لومړۍ ورځ ۲۳ لوبغاړي وسوځېدل. دا په ۱۲۲ کلونو کې لومړی ځل دی چې د یوې ټیسټ لوبې په لومړۍ ورځ دومره زیاتې وېکټې سوځیدلې دي.

د کیپ ټاون ټېسټ لوبې په لومړۍ ورځ د سویلي افریقا په ۵۵ منډو ټول لوبغاړي وسوځیدل، بیا د هند اننګز په ۱۵۳ منډو پای ته ورسېد، ورپسې سویلي افریقا په دویم ځل په ۶۲ منډو خپل درې لوبغاړي له لاسه ورکړل.

په دې توګه د لوبې په لومړۍ ورځ ټولټال ۲۳ لوبغاړي وسوځېدل، چې دا په تېرو ۱۲۲ کلونو کې د ټیسټ لوبو په لومړۍ ورځ د ډېرو ویکټو د سوځېدو ریکارډ دی.

د جیو نیوز د راپور له مخې، تر دې وړاندې په ۱۹۰۲ کال کې د انګلستان او اسټرالیا ترمنځ د لوبې په لومړۍ ورځ ۲۵ لوبغاړي وسوځېدل، په داسې حال کې چې په ۱۸۹۰ کال کې د اسټرالیا او انګلستان ترمنځ د لوبې په لومړۍ ورځ ۲۲ لوبغاړي وسوځېدل.

په ۱۸۸۸ کال کې د انګلستان او اسټرالیا د لوبې په دویمه ورځ ۲۷ لوبغاړي وسوځېدل.

په ۱۸۹۶ کال کې د اوول ټیسټ لوبې په دویمه ورځ ۲۴ لوبغاړي وسوځېدل. په ۲۰۱۸ کال کې د هند او افغانستان د چنای ټیسټ لوبې په دویمه ورځ ۲۴ وېکټې، په کیپ ټاون کې په ۲۰۱۱ کال کې د سویلي افریقا او استرالیا ټیسټ لوبې په دویمه ورځ ۲۳ لوبغاړي وسوځېدل.