د افغانستان کرېکټ ملې لوبډلې له متحده عربې اماراتو د شل اوريزو لوبو لوبلړۍ وګټله
د افغانستان کرېکټ ملې لوبډلې له متحده عربې اماراتو څخه د کرېکټ د شل اوريزو لوبلړۍ درېیمه او وروستۍ لوبه د ۴ ويکټو په توپير وګټله. دغه سيالۍ په شارجه نړۍوال کرېکټ لوبغالي کې تر سره شوې.
د لوبې پچه متحده عربي اماراتو وګټله او توپوهنه یې انتخاب کړه.
د افغانستان کرېکټ ملې لوبډلې د بهترينې توپ اچونې سره په شلو اورنو کې د متحده عربې اماراتو ۹ لوبغاړي وسوځول او ۱۲۷ منډې هدف وټاکل شو.
افغان تېز توپ اچونکي نوين الحق د متحده عربي امارتو څلور، قيس احمد درې او عظمت الله عمرزي د اماراتو دوه لوبغاړي وسوځول.
افغانستان دغه هدف په ۱۸.۳ اورونو کې د نجيب الله ځدران په تېزه توپوهنه پوره کړ.
نن په افغان توپوهنونکو کې تر ټولو ډېري منډي حضرت الله ځاځی جوړې کړې، هغه په ۳۲ توپونو ۳۶ منډې وکړې.
د لوبې غوره لوبغاړی نوين الحق انتخاب شو.
افغان کرېکټ ملې لوبډلې د لوبلړۍ لومړۍ لوبه د ۷۲ منډو په لوی توپير ګټلې او دویمه لوبه افغان لوبډلې د ۱۱ منډو په توپير بايللې وه.
له دغه لوبلړۍ وروسته افغان ملي لوبډله د هند له ملي لوبډلې سره درې شل اوریزه لوبلړۍ پیلوي.
د افغانستان او هند تر منځ د شل اوریزې لوبلړۍ لومړۍ لوبه د روان میلادي کال د جنورې په ۱۱مه د هند په موهالي لوبغالي کې دویمه لوبه د جنورۍ په ۱۴مه او درېیمه لوبه د جنورۍ په ۱۷مه تر سره کیږي.
