مولانا فضل الرحمن یو وار بیا د ټاکنو د ځنډولو غوښتنه وکړه
د جمعیت علمای اسلام ګوند مشر مولانا فضل الرحمان په ډېره اسماعیل خان کې په خپل کاروان له وروستي برید څخه وروسته یو ځل بیا د ټاکنو د ځنډولو غوښتنه کړې ده. د یوې خبري غونډې پرمهال هغه ټینګار وکړ، چې فرصتونه باید یوازې یو سیاسي ګوند ته ځانګړي نه وي.
هغه وويل، د لېول پلېنګ فيلډ مسله يوازې د يو ګوند لپاره نه ده او په خېبرپښتونخوا او بلوچستان دواړو صوبو كې دې د ټولو ګوندونو لپاره د امن ماحول رامنځته شي.
مولانا په وروستۍ پېښه تبصره وکړه او ویې ویل، چې د هغه کاروان په نښه شوی.
هغه زیاته کړه:« دا زما په اړه نه ده، چې زه هلته وم او که نه وم؛ خو دا کار په سیمه کې قانون او نظم ته زیان رسوي.»
هغه په خېبرپښتونخوا او بلوچستان دواړو صوبو کې د امنيتي وضعې په اړه د اندېښنې څرګندولو سره په داسې حالاتو کې د ټاکنیز کمپاين د ترسره کولو امکان تر پوښتنې لاندې راوست.
نوموړي د ټاکنو د بهیر لپاره د یوه سولهییز چاپېریال په ټینګولو هم ټینګار وکړ.
هغه زیاته کړه، چې د پیپلز ګوند نوماندانو د امنیت مسلو په اړه ورته اندېښنې څرګندې کړې او وړاندیز یې وکړ، چې د رایې ورکوونکو کمه برخه په احتمالي توګه د درغلۍ لامل کېدی شي.
نوموړي د سولهييز چاپېريال د ټینګښت په موخه د ټاکنو مهالوېش کې د لږ ځنډ وړانديز وکړ او په اوسنيو شرايطو کې يې د ټاکنو د ترسره کېدو د امکان په اړه شک څرګند کړ.
هغه د پاکستان له ټاکنو کمېسیون څخه وغوښتل، چې په دې اندېښنو غور وکړي او ټینګار یې وکړ، چې شته وضعیت ممکن په ناڅرګنده توګه درغلۍ ته لاره هواره کړي.
نوموړي اندېښنه وښوده، چې که راتلونکې ټاکنې د امنيتي ستونزو او بې ثباتۍ له امله له منځه ولاړې شي؛ نو په نړۍواله کچه به پر پانګونې منفي اغېز وکړي.
هغه وويل:« نړۍوالې ټولنې او ملګرو هېوادونو په دې اړه خفګان څرګند كړی او ويلي يې دي، چې كه پخواني چارواکي بېرته راشي؛ نو بيا په پاكستان كې پانګونې ته زړه نه ښه كوي.»
