پاکستان کې په دوو جلا پېښو کې درې وسلوال او یو پوځي وژل شوي دي
د پاکستان پوځ وايي، د پښتونخوا په باجوړ کې یې نن درې وسلوال وژلي او یوه اندازه وسلې او مهمات یې تر لاسه کړي دي. پوځ دا هم وايي، چې بېګا د شمالي وزیرستان په سپین وام کې وسلوالو پر سرحدي پوستو ډزې کړي او له امله یې یو پوځي وژل شوی دی.
پوځ دا نه دي ویلي، چې ځوابي برید کې وسلوالو ته هم زیان رسېدلی دی او که نه.
د ۲۰۲۳ کال وروستۍ ورځ د پاکستان پوځ ته د بلوچستان په اواران ضلع کې هم د پنځو وسلوالو د وژلو خبره کړې ده، خو د خپلې مرګ ژوبلې په هکله یې څه نه دي ویلي.
بل خوا په ټیلیګرام کې تحریک طالبان پاکستان ته نېږدې سرچینې وايي، چې په وزیرستان کې یې دوه پوځیان وژلي او یو ټپي دی.
