د پاکستان پوځ وايي په بلوچستان کې یې پنځه وسلوال ووژل
د پاکستان پوځ وايي، د بلوچستان د اواران ضلعې په مشکۍ سیه کې یې د استخباراتي عملیاتو له مخې پنځه وسلوال ووژل. د پوځ د عامه اړیکو څانګه وايي، په دې عملیاتو کې یې وسلې، مهمات او باروت هم موندلي دي. د دې ادارې په خبره، په سیمه کې د وسلوالو د له منځه وړلو لپاره عملیات روان دي.
د پاکستان پوځ پرون وویل، په ۲۰۲۳ میلادي کال کې یې په ټول هېواد ۱۸ زره ۷۳۶ پوځي عملیات کړي، چې پکې یې ۵۶۶ وسلوال وژلي دي.
د پاکستان د پوځ د شمیرو له مخې، په دغه موده کې، د ۲۶۰ افسرانو او سرتېرو په ګډون تر زرو ډیرو کسانو په ترهګریزو بریدونو کې خپل ژوند له لاسه ورکړی دی.
