هند له پاکستانه غوښتي چې د ممبيي مشکوک بریدګر حافظ سعید ور وسپاري
د هند د بهرنیو چارو وزارت ویاند اریندم باغچي د جمعې په ورځ په یوه خبري غوڼډه کې خبریالانو ته ویلي، چې هند په رسمي ډول له پاکستان غوښتنه کړې چې حافظ سعید هند ته د محاکمې لپاره ور وسپاري. نوموړي د ممبيي ښار د ۲۰۰۸ کال به مرګونو بریدونو کې په لاس لرلو تورن دی.
باغچي خبریالانو ته ویلي: "مونږ د پاکستان حکومت ته دغه غوښتنه له اړوندو اسنادو سره سپارلې ده."
په ۲۰۰۸ کال د لشکر طیبه ډلې سره په تړاو شکمنو لسو پاکستانيانو په ممبيي کې پر ودانیو برید وکړ، چې ۱۶۴ کسان یې ووژل.
د بریدونو په ترڅ کې ۹ تنه بریدګر وژل شوي او یو تن ژوندی پاتې شوی وو.
محمد اجمل قصاب چې د دغو بریدګرو له ډلې یوازینی ژوندی پاتې شوی کس وو په ۲۰۱۲ کال کې اعدام شو.
دغو بریدګرو د پاکستان له کراچۍ ښار څخه ممبيي ته کښتۍ کې تللي وو.
د لارې په اوږدو کې، دوی د کب نیولو یوه کښتۍ هم تښتولې او پکې سپاره پنځه کسان یې وژلي وو.
