د عمران خان مېرمن به د راتلونکي کال د جنوري په څلورمه محاکمه شي
د پاکستاني رسنیو د رپوټونو له مخې؛ په اسلام اباد کې یوې محکمې د دولتي ډالیو د فساد یا توشه خانې په قضیه کې د پخواني لومړي وزیر عمران خان او د هغه مېرمن بشرا بي بي د محاکمه کېدو لپاره نېټه ټاکلې ده. له دې وړاندې د اسلام اباد سترې محکمې د عمران خان محکمه ځنډولې وه.
د دغې محکمې غوڼډه د اډياله محبس کې تر سره شوې او څلورم د جنورۍ یې د عمران خان او د هغې د مېرمنې د محاکمې لپاره ټاکلې ده.
توشه خانه هغه ځای دی چې لومړي وزیر او د هغه مېرمنې ته د نړۍوالو شخصیتونو له خوا ورکړل شوې تحفې پکې ساتل کیږي.
په عمران خان او د هغه پر مېرمنې تور دې چې د واک په مهال یې ترلاسه کړې تحفې د دې پر ځای چې توشه خانې ته وسپاري، خپله یې اخیستي دي.
د ادیاله په محبس کې د محکمې د غوڼډې پرمهال عمران خان او د هغه مېرمنې ته د دغه تور په اړه موجود اسناد ورسپارل شوي دي.
د ډسمبر په ۲۳مه عمران خان او بشرا بي بي د همدې قضیې په تړاو د حساب ورکونې ملي ادارې ته ورغوښتل شوي وو.
محکمې د دغې ادارې له خوا وړاندې کړل شوي اسناد منلي چې له مخې یې عمران او د هغه مېرمنې د نړۍوالو سفرونو پر مهال ۱۰۸ تحفې ترلاسه کړې خو یوازې ۵۸ یې بېرته توشه خانې ته سپارلي دي.
د توشه خانې قضیه د پاکستان په سیاست کې وروسته له هغه د یوې مهمې قضیې په توګه راڅرګنده شوه، چې د ټاکنو کمېسیون تېره میاشت د "غلطو څرګندونو او اعلانونو" له امله عمران خان په ټاکنو کې له ګډونه محروم کړ. عمران خان د لومړي وزیر په توګه د کار پرمهال په فساد تورن شوی او له همدې امله له دندې ګوښه شوی و.
قاضي د عمران خان د شتمنو په ثبت کې د تضاد شتون په ګوته کړي او ویلي یې دي، چې د هغه په بانکې اکونټ کې شته پیسې د دولتي ډالیو د ارزښت په نیمايي دي.
د ټاکنو کمېسیون وايي، چې عمران خان مکلف و چې له هر سفره له راستنېدو وروسته یې باید په خپل اکونټ کې د شته پیسو اندازه له مربوطه ادارو سره شریکه کړی وی؛ خو هغه دغه کار نه دی کړی.
