پاکستان د فلسطین سره له خواخوږۍ په موخه د نوي کال د نمانځلو جشنونه لغوه کړي دي

د پاکستان سرپرست لومړي وزیر انوارالحق کاکړ د غزې له خلکو سره د خواخوږۍ د څرګندولو په موخه په دغه هېواد کې د نوي کال په نمانځلو بندیز لګولی دی. د پاکستان ملت ته په یوه لنډه وینا کې کاکړ له خپلو هېوادوالو غوښتي چې د نوي کال په لړ کې د فلسطینیانو ملاتړ وکړي.

کاکړ په دغه بحراني حالاتو کې د فلسطین له خلکو سره د اتحاد پر اړتیا ټینګار کړی. هغه په ​​فلسطین کې روان وضعیت ته په اشارې سره ویلي، چې د اکتوبر له اوومې نېټې راهیسې د اسراییل په بمباریو او بریدونو کې څه د پاسه نهه زره ماشومانو په ګډون څه باندې ۲۱ زره فلسطینیانو خپل ژوند له لاسه ورکړی دی.

نوموړي په غزه او لويديځه غاړه كې د بې ګناه ماشومانو پر ټولوژنه او د بې وسلې فلسطينيانو په نسل وژنې ژور خپګان څرګند کړ.