د هند او افغانستان د کرېکټ لوبو د نندارې د لوړې بیې ټکټ په ۵۹۴۷ هندۍ کلدارې پلورل کیږي
د افغانستان او هند تر منځ د شل اوریزو کرېکټ لوبو د لېدلو لپاره د ټکټ بیې اعلان شوي او ټاکل شوې ده، چې د دواړو هېوادونو تر منځ لومړۍ لوبه د ۲۰۲۴ کال د جنوري میاشتې په یوولسمه په هند کې وشي.
د مدهیا پردیش کرېکټ ادارې (APCA) د پنجشنبې په ورځ (د ډسمبر ۲۸مه) اعلان وکړ، چې د افغانستان او هند لوبډلو تر منځ د شل اوریزو لوبو چې د جنورۍ په ۱۱مه پیلېږي، نندارچیان کولی شي د لوبې د لېدلو لپاره ارزانه ټکټ په ۷۴۳ هندي کلدارو او ګران بیه ټکټ په ۵،۹۴۷ هندې کلدارۍ وپیري.
افغانستان به د لومړي ځل لپاره په ځايي هولکر لوبغالي کې چې د شاوخوا ۲۸ زره نندارچیانو ظرفیت لري، لوبه کوي.
چارواکي وايي، چې د هند او افغانستان د شل اوریزو لوبو لپاره د ټکټونو انلاین پلور به د ډسمبر په ۳۰مه د سهار په ۶ بجو پیل شي.
د هند او افغانستان ترمنځ د درې شل اوریزو لوبو لړۍ به د جنورۍ په ۱۱مه پیل او د جنورۍ په ۱۷مه پای ته ورسېږي.
د افغانستان او هند ترمنځ د شل اوریزو لوبو مهالویش
لومړۍ لوبه – ۱۱ جنوري ۲۰۲۴ په موهالي لوبغالي کې
دویمه لوبه – ۱۴ جنوري ۲۰۲۴په اندور لوبغالي کې
درېیمه لوبه – ۱۷ جنوري ۲۰۲۴په بنګلور لوبغالي کې
