اسلامي پراختیايي بانک: د افغان میندو او ماشومانو د روغتیا لپاره ۱.۵ میلیونه ډالر ور کوو

اسلامي پراختیایي بانک وايي، په افغانستان کې میندو او ماشومانو ته د روغتیايي خدمتونو د وړاندې کولو لپاره ۱.۵ میلیونه امریکايي ډالره ورکوي. اسلامي پراختیایي بانک په اېکس پاڼه کې لیکلي دي، چې دغه بودیجه په بیلابیلو ولایتونو کې د روغتیايي خدمتونو په وړاندې کولو ولګول شي.

په افغانستان کې د روغتيا د نړيوال سازمان استازي ډاکتر لو ډاپنګ د اسلامي پراختيايي بانک له دې بوديجې مننه کړې او ویلي یې دي، چې په دې پيسو سره به د روغتيا نړيوال سازمان اړمنو کسانو ته ژوند ژغورونکي روغتيايي خدمتونه وړاندې کړي.

دغه راز په افغانستان کې د روغتيا د نړيوال سازمان همغږي کوونکې ډاکتر پاټا چیکويدزي په لوړ کیفیت سره د ميندو او ماشومانو د روغتيايي خدمتونو وړاندې کول اړين بللي دي.

هغه زیاته کړې چې په افغانستان کې د میندو او ماشومانو د مړینې د مخنیوي لپاره د باکیفیته روغتیايي خدمتونو وړاندې کول حیاتي دي.

دا په داسې حال کې ده، چې تر دې وړاندې د روغتیا نړیوال سازمان ویلي و، چې د افغانستان روغتیايي سیستم په جدي توګه د بودیجې له کمښت سره مخ دی او د دغه وضعیت دوام به ناوړه پایلې ولري.

له دې سره، د ملګرو ملتونو د بشري مرستو د همغږۍ دفتر یا اوچا هم ویلي وو، چې په افغانستان کې له هرو ۱۰۰ زرو زیږونونو څخه ۶۹۹ مواردو کې مور او یا ماشوم ژوند له لاسه ورکوي، چې دا په افغانستان کې د میندو او ماشومانو د مړینې تر ټولو لوړه کچه ده.