د کابل طبي پوهنتون یو استاد او ډاکټر ووژل شو
د کابل طبي پوهنتون استاد او د میوند کادري روغتون د جلدي څانګې مشر پوهنوال ډاکټر غفار همدرد نن کابل ښار کې ووژل شو. د کابل لپاره د طالبانو د امنیه قومندانۍ ویاند خالد ځدراڼ کورنیو رسنیو ته ویلي، هغه کس یې نیولی چې د ډاکټر همدرد کورنۍ د نوموړي قاتل بللی دی.
د ډاکټر همدرد ملګرو په خواله رسنیو کې کې لیکلي، چې نوموړی په کارته نو کې د خپلې معاینه خانې مخ ته وژل شوی دی.
خواله رسنیو کې ځینې ډاکټرانو د ډاکټر همدرد پر وژل کېدو خواشیني ښودلې او په خپله برخه کې یې وړ کس بللی دی.
که څه هم طالبان په افغانستان کې د پوره امنیت دعوه کوي؛ خو وخت ناوخت کابل او ولایتونو کې هدفي وژنې کېږي.
تېره اونۍ په ننګرهار کې یو شپږ کلن ماشوم هم د تښتوونکو له لوري لومړی تښتول شوی او بیا یې وژلی دی، چې طالبانو یې په اړه چوپتیا غوره کړې ده.
