د طالبانو د کډوالو او ستنېدونکو چارو وزارت وايي، دغه افغان کډوال له ایرانه په جبري ډول او خپله خوښه هېواد ته ستانه شوي.
د کډوالو او ستنېدونکو چارو وزارت پر خپلې اېکس پاڼه لیکلي چې، د مرغومي په څلورمه نېټه له ایرانه ۱۶۳۸ افغان کډوال د اسلام کلا له لارې هېواد ته ستانه شوي.
د دغه وزارت د معلوماتو له مخې، یو شمېر دغه کډوال د ایران د حکومت له لورې په جبري توګه او یو شمېر هم په خپله خوښه هېواد ته ستانه شوي.
د طالبانو د کډوالو او ستنېدونکو چارو وزارت وايي، راستانه شوي اړمن کډوال یې د ملګرو ملتونو د کډوالۍ عالي کمېشنرۍ ته د مرستو ترلاسه کولو په موخه ور پېژندلي دي.
طالبانو ویلي چې، د پاکستان او ایران څخه د ستنېدونکو کډوالو لپاره یې د هېواد په ګڼو ولایتونو کې د کډوالو د اوسېدو لپاره لنډمهاله پنډغالي جوړ کړي، چې د ژوندانه د لومړنیو اړتیاوو ټولې اسانتیاوې په کې برابرې دي.
په تېرو څو میاشتو کې له ایرانه د ستنېدونکو کډوالو د کره شمېر په اړه معلومات نه دي خپاره شوي؛ خو په تېرو نږدې درېیو میاشتو کې له پاکستانه شاوخوا پنځه سوه زره افغان کډوال هېواد ته ستانه شوي دي.