په کابل ښار کې چاودنه: درې ټپیان ایمرجنسي روغتون ته لیږدول شوي دي

د کابل ښار د لومړۍ ناحیې اړوند پارک شهر ته نږدې د دوشنبې په ورځ (د مرغومې ۴ مه) چاودنه شوې. ایمرجنسي بیړني روغتون په خپله اېکس پاڼه کې لیکلي، چې تر دې دمه دې روغتون ته له دغې پېښې درې ټپیان وروړل شوي دي.

تر اوسه د دې چاودنې څرنګوالی معلوم نه دی او هیڅ کومې ډلې هم د پيښې مسوولیت پر غاړه نه دی اخیستې.

د ايمرجنسي روغتون مسوولينو د ټپيانو روغتيايي حالت د ډاډ وړ بللی دی.

زمونږ له هڅو سره سره په کابل کې د طالبانو د امنیې قومندانۍ او د دې ډلې امنیتي بنسټونو په دې اړه څه نه دي ویلي.