د پښتون ژغورنې غورځنګ پلویانو پرون د بلجیم په بروکسل کې پراخ لاریونونه وکړل
د پښتون ژغورنې غورځنګ ګڼو اروپا مېشتو غړو او پلویانو د بلجیم په پلازمېنه بروکسل کې د پاکستان د حکومت پر ضد لاریون وکړ او د دغه غورځنګ د مشرانو او نیول شویو بلوڅانو د خوشې کولو غوښتنه یې کوله.
دغه کنفرانس او لاریون ته له هالنډ، فرانسې، اېټالیا، جرمني او ګڼو نورو هېوادونو څخه د دغه غورځنګ پلویان وربلل شوي وو.
په دغه کنفرانس او لاریون کې ویناوالو د پاکستان پوځ او ادارې د پښتنو، بلوڅو، سیندیانو، سراییکیانو، کشمیریانو او نورو لږکیو په زرګونو صحرایي وژنو، په زور نادرکه کولو او نورو بشري جرمونو تورن کړ.
د کنفرانس ویناوالو د پيټياېم پر مشر منظور پښتین برید او د هغه د ملګرو ناقانونه نیول او په بند کې ساتل وغندل او ژر تر ژره یې د خوشې کولو غوښتنه وکړه.
همدا راز په اسلام اباد کي د بلوڅ پیوستون لهخوا له تربت څخه اسلام اباد ته پر رسېدلي لاریون تشدد او نیول بشري ضد عمل وګڼل شو.
دغه لاریونونه تر اوسه د اسټرالیا، امریکا او اروپا په ښارونو کي شوي؛ خو دوی وايي چې دغه لړۍ به تر هغې روانه پاتې وي، چې د پاکستان د ادارې او پوځ په پالیسیو کې بدلون نه وي راغلی.
دا رنګه دوی ادعا کوي، چې په پښتونخوا کې په خپله خاوره د خپل اختیار او خپلواکۍ له پاره به سولهییزې مبارزې ته دوام ورکوي.
خو پاکستان بیا د دوی دغه کړنې د دغه هېواد د نافذه قانون خلاف کړنې ګڼي او وايي، دوی د نورو په لمسون غواړي دلته د مېشتو قومونو تر منځ بېلتون ته لمن ووهي.
