د یونان سیمه ییزو چارواکو ویلي، د دغه هېواد په جنوب کې یې په ویجاړه کښتۍ کې ۸۱ کسان ژغورلي دي.
ددغو چارواکو په خبره، دا کډوال د پاکستان، سوريې او مصر دي او د دوی کښتۍ په هغه لاره کې خرابه شوې وه، چې عموما ايټاليا ته بې اسناده کډوال پرې ځي.
د يونان په جنوبي بندر کالاماتا کې د ښاروالۍ چارواکو ويلي، دغو کسانو ته یې لنډ مهال سرپنا برابره کړې ده.
دغه چارواکو د نورو معلوماتو له ورکولو پرته ويلي، چې د ژغورنې عمليات يې د يونان په سوېل کې تر سره کړي.
تېر جون کې هم په همدې لاره د کب نيولو يوه کښتۍ دوبه شوې وه، چې سلګونو کډوال پکې ووژل شول.
د یونان سمندرساتي توانيدلي وو، چې ۱۰۴ کسه وژغوري او ۸۲ جسدونه پيدا کړي، په همدې مهال ۵۰۰ نور کسان، چې په کښتۍ کې ول ورک او پيدا نه شول.
د راپورونو له مخې په دغه کښتۍ کې سلګونه پاکستاني کډوال هم وو.