د پاکستان د بهرنیو چارو وزارت ومنله، چې دوی د ټيټيپي د ځپلو لپاره له امریکا مرسته غوښتې
د پاکستان د بهرنیو چارو وزارت ویاندې ممتاز زهرا بلوڅ په یوې خبري ناسته کې امریکا ته د پاکستان د لوی درستیز جنرال عاصم منیر د سفر په اړه ومنله، چې د ټيټيپي د ځپلو او نورو مسایلو لپاره یې له امریکا څخه پوځي مرستې غوښتې دي.
خو زهرا بلوڅ په کابل کې د طالبانو هغه څرګندونې تایید نه کړې چې وایي، له یوه کال راهیسې یې تر څلوېښتو زیات د پاکستان د طالبانو د تحریک( ټيټيپي) غړي نیولي دي.
څه موده مخکې د طالبانو د کورنیو چارو وزارت ویاند ویلي و، چې دوی د پاکستان د تحریک طالبان تر څلوېښتو غړي نیولي او بندیان کړي دي.
د پاکستان د بهرنیو چارو وزارت ویاندې په دغې خبري ناسته کې وویل، دوی له افغانستان سره ښې اړیکې غواړي او پر ضد یې د هڅو ملاتړ نه کوي.
تېره ورځ د طالبانو د دفاع وزیر ملا یعقوب د پاکستان له نوم اخیستو پرته یو شمېر هېوادونه د دوستۍ له تمثیل سره، سره د دوی خلاف په هڅو تورن کړل.
ملا یعقوب چې د طالبانو په منځ کې یې پلویان د پاکستان ضد دریځ په لرلو تبلیغوي، تر دې مخکې هم د پاکستان خلاف توندې خبرې کړې وې.
پاکستان تر دې وړاندې له طالبانو غوښتي و، چې د ټيټيپي غړي دې ونیسي او دوی ته دې وسپاري چې د همدغې غوښتنې د نه منلو له امله نن سبا د دواړو هېوادونو اړیکې ترینګلې شوې هم دي.
