د پاکستان د لومړي وزیر مرستیاله وايي کریسمیس د مینې، قربانۍ او امن پیغام دی
د بشري حقونو او د ښځو د پرمختګ لپاره د پاکستان د لومړي وزیر ځانګړې مرستیاله مشعال حسین ملک وایي، د عیسویانو اختر كریسمس «د مينې، قربانۍ او امن پيغام دی.»
مشعال حسین ملک دا څرګندونې د جمعې په ورځ په اسلام اباد کې د کریسمس لپاره په جوړه شوه غونډه کې د کیک پرې کول بر مهال وکړې.
نوموړې په دې مراسمو کې د کریسمیس مبارکي هم ور کړه.
مېرمن ملک وویل، هر مذهب د مینې، قربانۍ او امن درس ورکوي.
هغې زیاته کړه چې د واټیکان له پاپ سره په لیدنه کې یې د مذهبونو ترمنځ څو اړخیزه همغږي د نړۍ د سولې کیلي وبلله.
که څه هم نوموړې د پاکستان په جوړېدو کې د عیسویانو رول مهم بولي او وايي دوی هم قربانۍ ور کړې دي، خو پر عیسویانو سربېره هندوان او سیکان هم په دغه هېواد کې له سخت حالت سره مخ دي.
تېر دوبی هم د پنجاب په فیصل اباد کې قران ته د دوو عیسویانو د سپکاوي په تور پسې توندلارو څلور کلیساوې او د عیسویانو تر پنځوسو کورونه وسوځول.
