پاکستان په ټاکنو کې د نوماندانو د ګډون لپاره د نوم ليکنې موده تر يکشنبې پورې وغځوله

د پاکستان د ټاکنو کميسون، د دغه هېواد په ټاکنو کې د ګډون لپاره د کانديدانو د نوم ليکنې نېټه د يکشبنې تر ورځې پورې غځولې ده. د نوم ليکنې د مودې غځول، د پاکستان پخوانيو لومړي وزيرانو عمران خان او نواز شریف ته زمینه برابروي، چې په ټاکنيزو سياليو کې برخه واخلي.

د دې کمیسون ویاند د جمعې په ورځ په يوه بيان کي ويلي، چې « د نوماندانو او سياسي ګوندونو د ګډون د استانتيا په موخه د نوماندۍ د اسنادو د ثبت موده دوه ورځې نوره هم غځول شوې ده».

پر همدې مهال دغه کمېسون وايي، د ټاکنو په تړاو نورو پروګرامونو کې کوم بدلون نه راځي او ټاکنې د فبروري پر ۸ کېږي.

عمران خان د جمعې په ورځ په ټاکنو کې د ګډون لپاره خپل د نوماندۍ اسناد دغه کمېسون ته ورکړل.

د ښاغلي خان د حقوقي ټيم يوه غړي انتظار حسين پنجوتا رويټرز ته ويلي، پخواني لومړي وزير له خپل ټاټوبي مياوالې څخه د ملي شورا څوکۍ ته ځان نوماند کړی او پلان لري، چې د شنبې په ورځ له لاهور څخه بيا نوم ليکنه وکړي.

دا په داسي حال کې ده، چې ۷۱ کلن عمران خان له اداري فساد څخه نيولې د حکومتي اسنادو د افشا په ګډون له ګڼو تورونو سره مخ دی.

د پاکستان سترې محکمې د جمعې په ورځ د عمران خان او د هغه د بهرنیو چارو وزیر شاه محمود قریشي ضمانت منلی، خو معلومه نه ده، چې هغه به خوشي شي کنه.