په چین کې د طالبانو سفیر: د واخان دهلیز د پرانیستو لپاره دې هڅې ګړندۍ شي
چین کې د طالبانو سفیر وايي، واخان دهلیز د چین او افغانستان ترمنځ مهم ټرانزیټي او سوداګریز مسیر ثابتېدلای شي، ځکه پکار ده چې دواړه خواې یې د پرانیستو لپاره خپلې هڅې ګړندۍ کړي. بلال کریمي دا خبرې د چین د بهرنیو چارو وزارت د اسیایي څانګې له مشر لیو چینسونګ سره لیدنه کې وکړې.
د چین پلازمینه بېجنګ کې د طالبانو تر کنټرول لاندې د افغانستان سفارت نن په خپله اېکس پاڼه لیکلي دي، چبلال کریمي او لیو چینسونګ پر واخان سربېره د دواړو هیوادونو په اړه په بېلابیلو مسایلو خبرې وکړې.
له افغانستان سره د چین د مخامخ نښلېدو لپاره د واخان لارې جوړېدل د افغان جمهوریت لویه هیله هم وه او طالبان هم چې واکمن شوي بیا بیا له بېجنینګ ورته غوښتنه کوي.
د طالبانو د صنعت او تجارت وزیر نورالدین عزیزي هم چې د تېر اکټوبر پر ۱۴ چین ته تللی و، د واخان له لارې د افغانستان او چین د مخامخ نښلولو لپاره د سړک جوړولو پر پلانونو هم له چینايي چارواکو سره خبرې درلودې.
د طالبانو اوسنۍ اعلامیه کې دا نه دي ویل شوي لیو چینستونګ ور سره د واخان په هکله کومه ژمنه کړې او که نه، خو د هغه له خولې زیاتوي، چې چينايي شرکتونه فغانستان کې پانګونې ته وهڅوي او هيله یې څرګنده کړه، چې په مس عینک معدن باندې هم عملي کار پیلولولو ته زمینه برابره شي.
طالبانو دا نه دي ویلي، چې د مس عینک کان د عملي کار د پیلولولو پر وړاندې خنډونه څه دي.
خو د دې کان د استخراج په اړه بلال کریمي ویلي: « د اسلامي امارت مسئولین چمتو دي، چې د ایم سي سي شرکت له مسئولینو سره په ګډه د دې پروژې د عملي کار لپاره لاره هواره شي.»
د طالبانو سفیر د چین بهرنیو چارو وزارت د اسیايي څانګې مشر ته ډاډ ورکړی چې د افغانستان خاوره به د هیڅ کوم کاونډي هیواد پرضد نه کارول کیږي.
که څه هم چین او طالبانو خپل رسمي سفیران وګمارلي دی، خو تر اوسه د چین په کډون د نړۍ هیڅ کوم هیواد افغانستان په رسمیت نه دی پيژندلی.
