د افغانستان لپاره د پاکستان ځانګړي استازي د کډوالۍ نړۍوال سازمان له یوه پلاوي سره لیدلي
افغانستان لپاره د پاکستان ځانګړي استازي اصف دراني په اېکس پاڼه لیکلي، چې په اسلام اباد کې يې د کډوالۍ نړۍوال سازمان له عمومي مشرې امي پوپ او مل پلاوي سره ليدلي دي.
ښاغلي دﺭاني ليکلي، په دغې لیدنه کې نورو هېوادونو کې د هغو افغانانو مېشتيدنې په اړه خبرې وشوې چې د امريکا او ناټو ځواکونو د وتلو وروسته پاکستان ته راغلي دي.
د کډوالۍ نړۍوال سازمان پلاوي اسلام اباد ته پر داسې مهال سفر کړی، چې له پاکستانه لاهم د افغان کډوالو د جبري ستنېدا لړۍ په منظم ډول روانه ده.
تر دې وړاندې په روانه میاشت کې د امریکا د بهرنیو چارو وزارت یوه جګپوړې چارواکې هم اسلام اباد کې د افغانستان لپاره د پاکستان له ځانګړي استازي سره لیدلي و.
نوموړې د اصف دراني ترڅنګ د ځینو نادولتي او نړۍوالو سازمانونو سره هم کتلي وو؛ ترڅو د زیان منونکو افغانانو د خوندیتوب لپاره د ګډو هڅو په اړه خبرې وکړي او د متحده ایالاتو د پناه غوښتنې او کډوالۍ پروګرام کې د افغان کډوالو خوندي ځای پرځای کولو او بیا میشتیدنې بهیر ګړندی کړي.
