د پاکستان بهرنیو چارو وزارت ویانده: د هند په مالي ملاتړ ترهګرې ډلې زموږ خاوره کې فعالې دي
د پاکستان د بهرنیو چارو وزارت ویانده وايي، په دغه هېوادکې «ترهګرې ډلې د هند په مالي ملاتړ فعالې دي او تاوتریخوالی کوي.» ممتاز زهرا بلوڅ نن په اسلام اباد کې خبری غونډې په خبرو کې زیاته کړه، چې په نږدې راتلونکي کې به په دې هکله حکومت مفصل مالومات شریک کړي.
د هغې په خبره، په پاکستان کې له ترهګرو ډلو د هند مالي ملاتړ د دغه هېواد حکومت اندېښمن کړی دی.
خو هند بیا د پاکستان حکومت په دغه هېواد کې د وسلوالو په ملاتړ تورنوي.
اسلام اباد په روان تاوتریخوالي کې افغان طالبانو ته هم ګوته نیسي او وايي، په افغانستان کې د پاکستان ضد وسلوالو ته یې پنا ور کړې ده.
ممتاز زهرا بلوڅ نن هم وویل، چې تمه لري افغان ځمکه د پاکستان خلاف ونه کارول شي.
هغې زیاته کړه، چې اوس د تحریک طالبان پاکستان پرضد د افغان طالبانو د هڅو او د اغېز په هکله یې څه نه شي ویلي.
د نوموړې دا څرګندونې په داسې مهال دي چې په دې وروستیو کې د طالبانو کورنیو چارو وزارت وویل، په افغانستان کې یې د تحریک طالبان پاکستان تر ۴۰ وسلوال نیولي دي.
