د پاکستان تحریک انصاف ګوند: پخوانی لومړی وزیر عمران خان راتلونکو ټولټاکنو کې برخه اخلي
د پاکستان د تحريک انصاف ګوند مشر ګوهر خان د چهارشنبې په ورځ وویل، پخوانی لومړی وزير عمران خان په راتلونکو انتخاباتو کې د لاهور، مياوالې او اسلام اباد په ګډون له درېيو حوزو ځان کانديدوي. ښاغلی خان دا مهال د راولپنډۍ په اډياله زندان کې بندي دی.
د اګست په پنځمه د اسلام اباد یوې محکمې عمران خان ته د پاکستان د ټاکنو کمیسیون (ای سي پي) لخوا په یوه مقدمه کې د دولتي ډالیو د پټولو په تور د درې کالو بند سزا واوروله.
د دغې پرېکړې له مخې نوموړی د پنځو کلونو لپاره د ټاکنو له نوماندۍ بې برخې شو.
که څه هم په همدې میاشت کې د اسلام اباد سترې محکمې د هغه درې کلنه سزا وځنډوله خو هغه لا هم د نورو قضیو له امله په زندان کې دی.
له اډياله زندان څخه بهر له رسنیو سره په خبرو کې ګوهر خان وویل پي ټي ای غواړي چې ټولټاکنې د فبروري په اتمه نېټه ترسره شي.
هغه یادونه وکړه، «نن موږ پر هغه څه ډېر خپه یو چې شاه محمود قریشي وویل.»
هغه ادعا وکړه چې د تحریک انصاف د مرستیال شاه محمود قریشي د نوماندۍ کاغذونه د ښاغلي قریشي له د سکرتر «تښتول» شوي دي. «له خلکو په سرکونو د نوماندۍ کاغذونو تښتول به دا ټاکنې جعلي کړي.»
ګوهر خان زیاته کړه چې عمران خان ته به د پنجشنبې په ورځ د هغه د کاندیداتورۍ کاغذونه ورکړل شي او ژمنه یې وکړه، که خدای کول د تحریک انصاف بنسټګر به په دې انتخاباتو کې برخه اخلي.
د پي ټي ای مشر وويل: «عمران خان د ګوند له ټولو کارکوونکو غوښتي چې خپل د نوماندۍ کاغذونه جمع کړي» .
هغه زياته کړه چې د ګوند د ټکټونو د ورکولو فيصله به بيا هم عمران خان کوي.
د پي ټي ای مشر ویلي دي چي هغه به هم راتلونکي انتخاباتو کي د خېبرپښتونخوا بونير نه برخه اخلي۔
