د پاکستان د پوځ لوی درستیز وايي، د ترهګرۍ ضد جګړه به یې روانه وي
د پاکستان د پوځ لوی درستیز وایي، هېواد یې «د ترهګرۍ ضد جګړه کې ډېره قرباني او مرسته کړې ده او د ترهګرۍ تر منطقي ختمولو او د خپل ولس د ارمان پوره کولو» پورې به په دې برخه کې جګړه کوي. عاصم منیر دا خبرې په امریکا کې د فکري مرکزونو او رسنیو له استازو سره په ناسته کې کړې دي.
نوموړي، په دغه ناسته کې د سیمه ییز امنیت، ترهګرۍ او سوېلي اسیا کې د ستراتیژیک ټیکاو په هکله د پاکستان پر لیدلوري خبرې وکړې.
عاصم منیر د ډیسمبر پر لسمه امریکا ته تللی او له هغه راهیسې یې د دغه هېواد له ولسي او پوځي چارواکو سره لیدنې روانې دي.
د نوموړي له سفر سره هممهاله په پاکستان په تېره پښتونخوا کې پر امنیتي ځواکونو بریدونه هم ډېر شوي دي.
د ځینې شنونکو په باور، امریکا ته د پاکستاني چارواکو له تلو یا هم اسلام اباد ته د غربي مقاماتو په تګ سره ورته بریدونه ډېرېږي او دې سره پاکستان غواړي ځان د ترهګرۍ قرباني وښيي.
