پاکستان د ایران له غوښتنې وروسته ویلي، چې ترهګري د نړۍ او سیمې امنیت ګواښي

د ایران د بهرنیو چارو وزارت وایي، تېره ورځ امیرعبداللهیان له خپل پاکستاني اڼډول جلیل عباس سره د ترهګرۍ د ګواښونو په اړه ټیلفوني خبرې کړې دي. د جمعې په ورځ د ډسمبر ۱۶مه د ایران په سیستان او بلوچستان ولایت کې په یوه برید کې ۱۱ ایراني پولیس ووژل شول.

له دې پېښې وروسته ایران وویل، چې بریدګر له پاکستانه ورغلي وو.

د دغه برید مسوولیت د جېش العدل په نوم ډلې په غاړه اخیستی و.

د ایران دولتي خبري اژانس اېرنا د خپل هېواد د کورنیو چارو وزیر احمد وحیدي په قول ویلي و، چې پاکستان دې په خپله خاوره کې د ترهګرو د پټنځایونو مخه ونیسي.

پاکستان د ایران په غبرګون کې وویل، چې ترهګري د ټولې سیمې او نړۍ لپاره ګواښ دی او د دوه اړخیزې او سیمه‌ییزې همکارۍ له لارې یې مخه نیول کېدای شي.

له بلې خوا د ایران تسنیم خبري اژانس پرون وویل، چې د ایران امنیتي ځواکونو په سیستان او بلوچستان ولایت کې د یوې بل برید مخه نیولې ده.

په خبر کې ویل شوي، چې د پوځ د موټرو په لاره کې د سړک په غاړه چاودېدونکي توکي اېښودل شوي وو؛ خو امنیتي ځواکونو مخکې تر دې چې دغه توکي وچوي، شنډ کړل.