طالبانو مولانا فضل الرحمان ته د افغانستان د سفر بلنه ورکړه
د پاکستان جمعیت علمای اسلام ګوند رسنیز دفتر وايي په اسلام اباد کې د طالبانو سفیر د دغه ګوند مشر مولانا فضل الرحمان ته د افغانستان د سفر بلنه ورکړې ده. دغه ګوند نن په خپله خبرپاڼه کې لیکلي چې د طالبانو سفیر مولانا فضل الرحمان ته د طالبانو یو ځانګړی پېغام هم رسولی دی.
د خبرباڼې له مخې، په اسلام اباد کې د طالبانو سفیر سردار احمد شکیب د مولانا فضل الرحمان کور ته ورغلی او له نوموړي سره کې یې د سیمې او د افغانستان او پاکستان پر اړیکو خبرې کړې دي.
دوی ویلي چې د افغانستان او پاکستان ښې اړیکې په سیمه کې د امنیت ضامن دي.
خو په دغه خبرپاڼه کې دا نه دي ویل شوي چې د طالبانو لخوا مولانا فضل الرحمان ته ځانګړی پېغام څه و او بل دا چې چې مولانا فضل الرحمان د طالبانو بلنه منلې او که نه.
مولانا فضل الرحمان چې د طالبانو په معنوي پلار هم مشهور دی، له څو لسیزو راهسې ی ېپه افغانستان کې د طالبانو جګړه روا بللې او د دغې ډلې سیاسي ملاتړی دی.
د طالبانو د بیا ځلي واکمنۍ کې دا لومړی ځل دی چې مولانا فضل الرحمان ته یې افغانستان ته د سفر بلنه ورکړې ده او هغه هم داسې وخت کې چې د پاکستان او افغانستان اړیکې چندانې ښې نه ښکاري.
د پاکستان حکومت پر طالبانو نیوکې کوي او وایي، د دوی په واکمنېدو سره په دغه هیواد کې د پاکستاني طالبانو بریدونه څو برابره زیات شوي دي.
پاکستان له دغو بریدونو وروسته له طالبانو غوښتي چې د پاکستاني طالبانو مشران دوی ته وسپاري.
هغه څه چې طالبان یې تل ردوي او له پاکستانه یې غوښتي چې دوی دې د تورونو پرځای د خپلې خاورې امنیت وساتي.
