د لښکر اسلام او ټي ټي پي ډلو په تیراه کې ۶ پاکستاني ځواکونو ته د مرګ ژوبلې ادعا کړې
په ټیلګرام کې د پاکستان مخالفو وسلوالو ډلو لښکر اسلام او تحریک طالبان پاکستان ته نېږدې کانالونه وايي، چې یادو دواړو ډلو د خېبر پښتونخوا په تیراه کې د پاکستاني پوځیانو پر یوې پوستې ګډ برید کړی، چې له امله یې دوه نظامیان وژل شوي او څلور نور ټپیان دي.
بل خوا سماء نیوز د خېبر پښتونخوا د یو شمېر چارواکو په حواله خبر ورکړی، چې تېره شپه یو شمېر وسلوالو په تیراه کې د پاکستاني نظامیانو پر پوستې برید کړی، چې له امله یې دوه نظامیان ټپیان شوي دي.
دا لومړی ځل دی، چې د پاکستان د حکومت دوه مخالفې ډلې پر یو ځای د ګډو عملیاتو خبر ورکوي، له دې وړاندې په جون میاشت کې هم د ګډو عملیاتو اعلان شوی و؛ خو د کوم ښکاره برید بېلګه یې معلومه نه وه.
