افغان سوک وهونکي د سویډن په سوک وهنې سیالیو کې دویم مقام خپل کړ
افغان سوک وهونکی محمدعوض وتوانېده، چې له دوو بریاوو وروسته د سویډن په سوک وهنې سیالۍ کې پایلوبې ته لاره ومومي او د دغو سیالیو دویم مقام خپل کړي.
دغه سیالۍ د سویډن په کارلستاډ ښار کې جوړې شوې وې، محمد عوض وتوانېده چې په ۷۵ کیلو ګرامه وزن سره خپل سیالان رصا نزار او احمد جبار ته ماتې ورکړي.
د محمد عوض لومړی سیال رضا نزار له مالمو ښار و، چې تېرکال دنړۍ د سوک وهنې تنکیو ځوانانو اتل شوی و.
د دغه افغان سوک وهونکي دویم سیال احمد جبار له استکهلم ښاره په دغو سیالیو کې ګډون کړی و، چې په درېیم رونډ کې د افغان لوبغاړي لخوا ناک اوټ شو.
محمد عوض په پایلوبه کې د خپل سویډني سیال لخوا ماتې وخوړه او د دغو سیالیو دویم ځای ځایګی یې خپل کړ.
