د پاکستان د کورنیو چارو سرپرست وزیر وايي، هغه قانوني افغان کډوال چې په سیاسي فعالیتونو کې یې ښکیلتیا څرګنده شي له دې هېواده به واېستل شي.
سرفراز بګټي زیاتوي، لس داسې کسان چې په سياسي فعاليتونو کې یې لاس درلود، د دغه هېواد امنیتی ځواکونو پېژندلي او له هېواده یې اېستلي دي.
د پاکستان دولتي رادیو د راپور له مخې، نوموړي د جمعې په ورځ په اسلام اباد کې خبري غونډې ته د وینا پر مهال زياته کړه، هغه افغانان چې پاکستان کې په قانوني توګه ژوند کوي او یا هم د کډوالۍ اسناد لري په سیاسي فعالیتونو کې برخه نه شي اخیستلی.
د کورنیو چارو سرپرست وزیر ټینګار وکړ چې یوازی د پاکستان اتباع په سیاست کې برخه اخیستلې شي.
ديوې پوښتنې په ځواب کې دکورنيو چارو وزير وويل د کډوالو د ستنیدولو پلان په کوم هېواد کې مشخص نه دی.
هغه وویل چې د افغانانو په ګډون بې اسناده بهرنیان اېستل کیږي. هغه وویل هر هغه څوک چې پاسپورت او ویزه لري پاکستان ته دې پخیر راشي.
له پاکستانه د افغان کډوالو د اېستلو لړۍ د تېر اکتوبر په لومړیو کې پیل شوې او د دغه هیواد چارواکي وایي د راتلونکي کال تر لومړۍ میاشتې به څه باندې یو میلیون افغان کډوال له پاکستانه وباسي.