د پښتون ژغورنې غورځنګ: د مشر د نیولو په غبرګون به نن په کور دننه او بهر لاريونونه وي
وروسته له هغه چې تېره ورځ په چمن کې منظور پښتین د پولیسو لهخوا ونیول شو، د هغه نیونې پراخ غبرګونونه له ځانه سره لرل. د منظور پښتین په اېکس پاڼه لیکل شوي:« د پښتون ژغورنې غورځنګ د مشر منظور احمد پښتين د ګرفتارۍ ضد به نن په ټول پاکستان او اروپایي هېوادونو کې لاريونونه وشي.»
په دغې لیکنه کې راغلي، د دغه غورځنګ ټولو ملګرو ته لارښوونه شوې چې په خپلو ضلعو کې په ګڼ شمېر کې په دې احتجاجي لاریون کې ګډون وکړي.
منظور پښتین تېره ورځ هغه مهال ونیول شو، چې له چمنه تربت ته د ورکو بلوڅانو پرلت کې د ګډون په موخه روان و.
د پښتون ژغورنې غورځنګ غړو په وینا:« پولیسو لومړی د مشر په موټر ډزې وکړې او له هغه وروسته یې ونیوو.»
دا لومړی ځل نه دی، چې د پاکستان حکومت په احتجاجي غونډو کې له ګډون وروسته د پښتنو ځینې مخکښې څېرې نیسي.
تر دې وړاندې د چمن پرلت کې د ګډون او وینا له امله د قامي اسمبلۍ پخوانی غړی علي وزیر هم د څو ورځو لپاره نیول شوی و او په پرلت کې د پخوانۍ قامي اسمبلۍ او د ملي ډیموکراټیک غورځنګ مشر محسن داوړ د ګډون مخه هم نیول شوې وه او هغه یې بېرته اسلام اباد ته راستون کړی و.
