د خوړو نړیوال پروګرام وايي،له افغان کډوالو سره د مرستې لپاره ۲۶ میلیونه ډالرو ته اړتیا لري
د خوړو نړیوال پروګرام وايي، له پاکستانه د راستنېدونکو یو میلیون افغان کډوالو سره د مرستې لپاره ۲۶.۳ میلیونه ډالرو ته اړتیا لري. دغه سازمان په یوه خبرپاڼه کې لیکلي چې افغان مهاجرین تر ټولو بد وخت کې اېستل کېږي او دوی نه پوهیږي چې څنګه له سخت ژمي ځان وژغوري.
دغه سازمان وايي چې په نومبر میاشت کې یې د نږدې ۲ سوه اتیا زره راستنیدونکو سره د خوراکي توکو او نغدو پیسو مرسته کړې.
د ملګرو ملتونو د شمېرو له مخې، د پاکستان د حکومت له خوا د بې اسنادهکډوالو د ایستلو لپاره د یوې میاشتې ضرب الاجل له اعلان سره، له ۳۷۰ زروډېر افغان کډوال په پاکستان کې د خپلو کورونو او ملکیتونو پرېښودو ته اړ شوي او بېرته افغانستان ته ستانه شوي دي.
دغه سازمان زیاته کړې، چې په ټول افغانستان کې له شپږ میلیونو څخه زیات کسان بې ځایه شوي، له پاکستانه راستانه شوي کډوال له ناڅرګند راتلونکي سره مخ دي.
له بلې خوا ملګري ملتونه وايي چې د افغانستان ځينې برخې لا هم د هغې زلزلې له خطر سره مخ دي چې په تلې مياشت کې يې د هرات ولايت ډېر کلي له خاورو سره خاورې کړل.
د خوړو نړیوال پروګرام ټینګار کړی چې په افغانستان کې چې د پرله پسې ناورینونو شاهده ده، د خپلو حیاتي مرستو د دوام لپاره بیړنۍ مرستې ته اړتیا لري.
