کاناډايي سازمان: کاناډا ته د تګ له پاره منل شوې شپږ افغانې کورنۍ له پاکستانه اېستل شوې
د "امان لارا" په نوم يوه کاناډايي سازمان افغانستان ته د هغو شپږو افغانو کورنیو د استولو خبر ورکړ چې کاناډا ته د لېږدېدو په تمه ول. ددغه نا پېیلي سازمان د اټکل له مخې، په پاکستان کې شاوخوا ۲۵۰۰ افغانان کاناډا ته د لیږدولو په تمه دي.
امانلارا هغه نا پېیلی سازمان دی چې له کړکیچنو هیوادونو څخه کاناډا ته له ګواښ سره مخامخ او وړ کسان لیږدوي.
دغه سازمان له پاکستانه له اېستل شويو افغان کډوالو غوښتي چې دغه سازمان سره اړیکه ونیسي چې له افغانستان څخه د هغوی د لیږد په برخه کې کار وکړي.
امان لارا اټکل کوي چې شاوخوا ٢٥٠٠ افغانان چې د کاناډا له حکومت سره يې کار کاوه په پاکستان کې دي او کاناډا ته د لېږدېدو په تمه دي.
کاناډا یو له هغو لوېدیځو هېوادونو څخه دی چې د افغانانو د لېږد بهیر یې نه دی درولی.
د کاناډا سيبي سي ټلویزیون د یکشنبې په ورځ راپور ورکړ چې د کاناډا د کډوالو وزارت په پاکستان کې په شرایطو برابرو افغانانو ته ویلي چې دوی باید "پاکستاني پولیسو ته اسناد وښيي چې دا ثابته کړي چې دوی کاناډا ته ځي او ونه اېستل شي."
په همدې حال کې دغه وزارت اعلان کړی چې له پاکستانه د افغان کډوالو د لېږدولو له پاره پر لا ډېرو الوتنو کار کوي.
