د بښنې نړېوال سازمان له طالبانو وغوښتل چې د ښځو حقونو فعاله پریسا ازاده ژر تر ژره خوشې کړي

د بښنې نړېوال سازمان د طالبانو له خوا په افغانستان کې د ښځو حقونو فعالې پریسا ازاده نیول غندي او دا یو خپلسری ګام بولي. دغه سازمان د جمعې ورځ په اېکس پاڼه لیکلي چې، پریسا ازاده او د ښځو حقونو نورې فعالانې منیژه صدیقي، ژولیا پارسي، ندا پرواني او رسول پارسي باید ژر تر ژره خوشې شي.

دغه سازمان همداراز ویلي چې، د طالبانو پرله پسې بندیزونه او د ښځو - نجونو د حقونو نا قانونه ځپل د بشریت ضد جرمونه او د جنسیت پر بنسټ ځورونه ګڼل کېږي.
ددغه سازمان په بیان کې راغلي: «د بښنې نړېوال سازمان یو ځل بیا د نړیوال قانون سره سم د جرمونو شواهدو د راټولولو او خوندي کیدو کېدل له پار د خپلواکو نړیوال حساب ورکونې د میکانیزم په رامنځته کېدو ټینګار کوي.»
د راپورونو له مخې، د افغان ښځو د عدالت او ازادۍ د غورځنګ غړې پریسا ازاده د تېرې سه شنبې په ورځ د کابل په لوېدیځ دشت برچي سیمه د طالبانو د استخباراتو له خوا نیول شوې ده.
سرچینې وایي چې د دغې نیول شوې معترضې میرمنې د ساتلو ځای مالوم نه دی.
د پریسا ازاده نیول له پراخه غبرګونونو او نیوکو سره مخ شوي.
په افغانستان کې د طالبانو له واکمنۍ څه باندې دوه کاله تېر شول، په دې موده کې طالبانو هڅه کړې چې د ښځو د کار او زده کړو د مخنیوي پر وړاندې د ښځو هر ډول اعتراضونه وځپي.
د طالبانو له ټولو بندیزونو او فشارونو سره، سره په افغانستان کې دننه او بهر د ښځو اعتراضونه دوام لري.
نن د جرمني په فرانکفورټ ښار کې د ښځو د حقونو فعالې تمنا زریاب پریاني د خپل اعتراض د څلورم پړاو د پیل خبر هم ورکړ.
معترضې افغان مېرمنې، طالبان له بشري حقونو څخه په سرغړونې او د جنسیتي توپیر په عملي کولو تورنوي او له نړیوالې ټولنې غواړي چې پر دې ډلې فشارونه زیات کړي.