د افغانستان کرېکټ بورډ د کڼو او ګونګیانو لوبډلې لپاره ازموینه اخلي

د افغانستان کرېکټ بورډ وایي؛ په قطر کې د کڼو او ګونګیانو جام سیالیو لپاره راتلونکې شنبه ازموینه اخلي. د کرېکټ بورډ د اعلامیې له مخې؛ دا ازموینه د جلال اباد ښار په نجیب الله ترکي لوبغالي کې اخیستل کېږي.

دا بورډ د پنجشنبې په ورځ په خپله اعلامیه کې د کرېکټ له تکړه کڼو او ګونګو لوبغاړو هیله کوي، چې په دې ازمونیه کې برخه واخلي او د پیاوړې لوبډلې په جوړولو کې ور سره مرسته وکړي.

د کڼو او ګونګیانو جام د راتلونکې ډیسمبر مياشتې له ۳مې تر ۱۲مې په قطر کې جوړېږي.