د نوښار په پبو سیمه کې یو افغان کډوال د خپلې پاکستانۍ مېرمنې په وژلو تورن شوی

ځايي پولیس وایي، تورن کس غوښتل خپله مېرمن له ځانه سره افغانستان ته ولېږدوي چې د هغې د انکار له امله نوموړي خپله مېرمن ووژله.

د تورن نوم محمد اصف ښودل شوی او ویل کېږي، چې لس کاله مخکې یې له یوې پاکستانۍ سره واده وکړ او دا مهال څلور ماشومان لري.
د پولیسو په وینا، محمد اصف د پبو په ښارګوټي کې د قصابۍ دوکان لاره، له هغه وروسته چې د پاکستان حکومت د بې اسناده کډوالو د اېستلو پرېکړه وکړه، نو محمد اصف هم اړ و چې خپله مېرمن او ماشومان افغانستان ته ولېږدوي، کله چې هغې له تګه انکار وکړ؛ نو اصف هغه په ډزو ووژله.
د نوښار پولیس وايي، له قتله وروسته اصف له خپلې یوې لور او درېیو زامنو سره په تېښته بریالی شوی او پولیس یې د نیولو هڅه کوي.
دا ښايي لومړۍ او وروستۍ پېښه نه وي، چې په پاکستان کې د افغان کډوالو تر منځ پېښیږي، تر دې وړاندې تېره اونۍ هم هغه افغان کډوال په کراچۍ کې د خپلې مېرمن د پخواني خاوند له لورې وژل شوی و، چې غوښتل یې خپله مېرمن او بچیان له ځانه سره افغانستان ته ولېږدوي.
په تېرو شاوخوا څلورو لسیزو کې ګڼو افغانانو د پاکستانیو مېرمنو او افغانو مېرمنو له پاکستاني نارینه‌وو سره ودونه کړي؛ خو اوس چې د بې اسنادو کډوالو د ستنولو خبره مخې ته راغلې دغه شان پېښې رامنځته کېږي، ځکه تر دې مهاله په پاکستان کې د دغه شان کډوالو له پاره د تابعیت قانون ناڅرګند دی، چې له امله یې دواړو خواوو ته یې زیاتې ستونزې راولاړې کړې دي.