د صربستان پولیس وايي، څه باندې ۴۵۰۰ کډوال یې نیولي دي
د صربستان پولیس وايي، په تېرو دوو اونیو کې یې له هنګري او بلغاریا سره د دغه هېواد په سرحدي سیمو کې تر ۴۵۰۰ ډېر کډوال نیولي دي. د صربستان د کورنیو چارو وزارت ویلي، چې تر ۱۲۰ ډېر نور کسان یې د انساني قاچاق او د وسلو او نشهیي توکو د لرلو په تور نیولي دي.
هغه د چهارشنبې په ورځ وویل چې، دغه کسان د اکټوبر له ۲۷ مې راهیسې د هنګري پولې ته څېرمه د سوبوټیکا، سومبور او کېکېنډا په ښارونو او له بلغاریا سره پولې ته څېرمه د پیروت په ښار کې نیول شوي او د حکومت تر کنټرول لاندې کمپونو ته لېږدول شوي دي.
د صربستان د کورنیو چارو وزیر زیاته کړه، چې پولیسو له ۸۱ زرو څخه د زیاتو موټرو او له ۳۰۰ څخه د زیاتو کورونو د پلټنو په ترڅ کې پنځه ماشیندارې، پنځه وسلې، له ۱۵۰۰ څخه زیاتې مرمۍ او سلګونه پاسپورټونه نیولي دي.
دغه لوړپوړي صربي چارواکي ونه ويل چې، دغه کډوال د کومو هېوادونو دي؛ خو ډېری هغه پناه غوښتونکي چې د بالکان له لارې د اروپايي ټولنې غړو هېوادونو ته ورځي د افغانستان، پاکستان، منځني ختيځ او شمالي افريقا دي.
دغه لاره له ترکیې څخه بلغاریا، شمالي مقدونیې او صربستان ته غځېدلې او بیا هنګري او نورو لویدیځو اروپایي هېوادونو ته رسېږي.
