طالبان: پکتیا کې د بېرته راستنېدونکو کډوالو لپاره د اوسېدو لنډمهاله پنډغالی جوړېږي
د طالبانو تر واک لاندې د پکتیا ولایت د رسنیو مرکز ویلي، چې د دغه ولایت په ډنډ پټان ولسوالۍ کې د بېرته راستنېدونکو کډوالو لپاره د طالبانو د پکتیا امنیه قوماندان محمدعمر مخلص په مشرۍ د ښه راغلاست او اسانتیاوو برابرولو کمیټې لهخوا د اوسېدو پنډغالي د جوړولو چارې پیل شوې.
دغه مرکز په اېکس پاڼه لیکلي، د کډوالو لپاره اسانتیاوو برابرولو کمیټه له لسو بېلابېلو ډلو جوړه شوې چې د لنډمهاله استوګنځایونو جوړولو او د راستنېدونکو کډوالو اصلي ځایونو ته د لېږد تر څنګ هغوی ته د لومړنیو اړتیاوو د پوره کولو چارې پر مخ وړي.
د طالبانو د پکتیا امنیه قومندان الحاج مولوي محمدعمر مخلص وايي: «دغه پنډغالی به په لومړیو کې د ۲۰۰ شاوخوا کورنیو د اوسېدو وړتیا ولري او له هغه وروسته، چې په دغه لاره څومره کډوال راځي د اوسېدو لپاره به یې ټولې اسانتیاوې برابرې کړو.»
هغه وایي، چې په دغه پنډغالي کې د استوګنې، خوړو او ټرانسپورټ تر څنګ د روغتیا په برخه کې ځانګړي کلنیکونه او سمبال روغتون هم په پام کې نیول شوی، چې د کډوالو لپاره به شپه او ورځ فعالیت کوي.
په پکتیا کې د طالبانو د کډوالو او بېرته راستنېدونکو چارو مشر مفتي حبیب الله شهیدزاده وویل، چې تر دې مهاله پکتیا ته د تورخم، سپین بولدک او ډنډ پټان له لارو تر ۴۰۰ پورې کورنۍ راستنې شوې دي.
هغه وایي، هڅه کوي د هغو کورنیو لپاره چې په ژمي کې د اوسېدو لپاره ځای نه لري، دوی ورته اسانتیاوې برابرې کړي.
د طالبانو تر واک لاندې د پکتیا ولایت د رسنیو مرکز ویلي، چې د ډنډپټان ولسوالۍ خرلاڅي بندر لاره له پولې ورهاخوا د امنیتي ستونزو له امله د نامعلومې مودې لپاره تړل شوې، چې ډېر ژر به د افغان کډوالو د راستنېدلو لپاره خلاصه شي.
