په نړۍوال جام کې انګلنډ هالنډ ته په ۱۶۰ منډو ماته ورکړه
د کرېکټ نړۍوال جام په ۴۰مه سیالۍ کې نن انګلنډ د هالنډ ملي لوبډلې ته د ۱۶۰ منډو په توپیر ماته ورکړه. د انګلنډ کپتان جوز بټلر د پچې په ګټلو سره د توپ وهلو پرېکړه وکړه او په ۵۰ اورونو کې یې د نهو ویکټو په زیان سره ۳۳۹ منډې جوړې کړې.
د انګلنډ په لوبډه کې بین سټوکس د ۱۰۸ منډو جوړولو سره تر نورو ښه وځلېده. نوموړي دغه منډې په ۸۴ بالونو سره پوره کړې چې شپږ څلوریزې او شپږ شپږیزې هم پکې دي.
د هالنډ له لوبډلې باسډي لیډاني درې ویکټې، اریان دت او لوګن وان بیک دوه دوه ویکټې او میکارین یوه ویکټه واخیسته.
د هالنډ ټول لوبغاړي د انګلنډ د ۳۴۰ منډو په تعقیب کې په ۳۷.۲ اورونو کې د ۱۷۹ منډو په ترسره کولو وسوزیدل.
د هالڼد توپ وهونکو سکاټ ایډورډز ۳۸، ویسلي بریسي ۳۷، او سایرانډ ۳۳ منډې وکړې.
د انګلنډ توپ اچوونکو معین علي او عادل رشید درې، درې ویکټې واخیستې.
دا لوبه د کوربه هند په پونه ښار کې ترسره شوه.
انګلنډ د کرېکټ د تېر جام د مدافع په توګه او همدارنګه هالنډ په سږني جام کې ښه ونه ځلېدل.
د سږني جام د نومرو له مخې هالنډ نهم او انګلنډ لسم ځای لري.
څرګنده ده چې دواړو لوبډلو نیمه پایلوبې ته لار نه ده موندلې.
