طالبان: ایراني چارواکو د اسلام کلا بندر له لارې تېره اوونۍ ۲۰ زره افغانان له هېواده شړلي
په هرات کې د طالبانو سیمهییز چارواکي وايي، چې ایراني چارواکو د اسلام کلا بندر له لارې تېره اوونۍ ۲۰ زره افغانان له هېواده شړلي دي. د اسلام کلا بندر د کډوالو او بېرته راستنېدونکو ادارې ویلي، چې تېره اوونۍ د دغه بندر له لارې ۲۰ زره کډوال افغانستان ته ستانه شوي دي.
د طالبانو تر کنټرول لاندې باختر اژانس په یوه راپور کې ویلي، راستانه شوي کډوال د ایراني پولیسو له ناوړه چلنده شکایت کوي او وايي، چې له دوی څخه یې په زوره پیسې هم اخیستې دي.
خو د طالبانو د رییس الوزرا مرستیال ملا غني برادر له افغان کډوالو سره د ایراني چارواکو له سلوکه مننه کړې او ویلي یې دي، چې هلته له افغان کډوالو سره د ایراني چارواکو چلن سم دی.
