د هوا ککړتیا د مخنیوي لپاره نوي ډېلي کې د ګاډو چلښت محدودېږي
د هند پلازمېنه نوي ډېلي کې د هوا ککړتیا د مخنیوي لپاره راتلونکې اونۍ د ګاډو چلښټ محدودېږي. دغه ښار کې د هوا ککړتیا د کمولو لپاره پر هڅو سربېره بیا هم د دریمې ورځې لپاره هوا تر خطرناکې کچې خرابه ده.
نوي ډېلي کې ځايي چارواکي وايي، د نومبر له ۱۳ تر شلمې د جفت او طاق له مخې د ګاډو د چلښټ قانون پیلوي.
د دې قانون له مخې د طاق نمبر پلېټ ګاډي په طاقو ورځو او د جفت پلېټ ګاډي په جفتو ورځو چلېږي.
چاپېریالپوهان وايي، له ۲۰۱۶ کال راهیسې دا قانون څو ځلې پلی شوی چې د ګاډو د بیروبار په کمولو کې ډېر، خو د هوا ککړتیا په کمولو کې کم اغېز لري.
هند د هر ژمي په سر کې د نړۍ تر ټولو ککړو ښارونو په نوملړ کې اول نمبر راځي. په دغه مهال په نوي ډېلي کې باد کم وي، هوا ټټیته وي او د ګاډو او صنعت او همدارنګه د ګاونډیو صوبو د کرنېزو محصولاتو د سوځولو له امله د هوا ککړتیا خورا لوړې کچې ته رسېږي.
تر ټولو ککړ ښار
د هوا څرنګوالي مالوموونکې سوېسۍ ادارې د تېرې اونۍ د څېړنې له مخې، د هند پلازمېنه نوی ډېلی بیا د نړۍ تر ټولو ککړو ښارونو د لېست په سر کې دی.
له نوي ډېلي وروسته د پاکستان لاهور د نړۍ دویم تر ټولو ککړ ښار بلل شوی دی.
په نوي ډېلي کې تېره اونۍ د هوا خطرناکه ککړتیا ۶۴۰ او لاهور کې ۳۳۵ درجې وه.
د هوا څرنګوالي ګراف تر پنځوسو درجو صحت ته ښه بلل کېږي، خو له ۴۰۰ تر ۵۰۰ درجې یې بیا د خلکو صحت اغېزمنوي او د ناروغانو لپاره خطرناک دی.
