علي اکبر احمدیان: ایران د افغانستان له خپلواکۍ او ثبات څخه ملاتړ کوي
د ایران ملي امنیت د عالي شورا منشي د یکشنبې په ورځ (د لړم ۱۴مه) د طالبانو د رییسالوزرا له مرستیال ملا عبدالغني برادر سره وکتل. علي اکبر احمدیان په دې کتنه کې وویل: «ایران د افغانستان له خپلواکۍ، ټیکاو او پرمختګ څخه ملاتړ کوي.»
د اېسنا خبري اژانس د راپور له مخې، ښاغلي احمدیان له طالبانو سره د سوداګریزې او صنعتي، ټرانسپورټ، کرنې، په هلمند سیند کې د ایران د حقابې او د اوبو په برخه کې د همکاریو په زیاتیدو ټینګار وکړ.
د دغه راپور له مخې، د ایران ملي امنیت د عالي شورا منشي د فلسطین په اړه هم د طالبانو د دریځ ستاینه وکړه.
د ایران اسلامي جمهوريت د نورو هېوادونو په څېر طالبان په رسمیت نه پېژني او د حقابې په اړه له کړکېچونو سره سره له دې ډلې سره نږدې اړیکې لري.
ملا عبدالغني برادر له علي اکبر احمدیان سره په کتنه کې د اقتصادي او سوداګریزو همکاریو پر پراختیا په ځانګړي ډول د ټرانزیټي سکتور پر فعالولو، چابهار بندر او د هوايي ټرانسپورت په برخه کې پر همکاریو ټینګار وکړ.
د اېسنا د راپور پر بنسټ، د طالبانو د رییسالوزرا مرستيال د افغانستان او ايران ترمنځ د هوکړه ليک عملي کېدل په ځانګړي ډول د اوبو، د پولو د اقتصادي کېدو او په دې برخه کې ګډه پانګونه د دواړو خواوو په ګټه وبلله.
ملا عبدالغني برادر تر دې کتنې مخکې د ایران د بهرنیو چارو له وزیر حسین امیر عبداللهیان سره کتلي وو.
حسین امیر عبداللهیان په دې کتنه کې ویلي چې د اسلامي جمهوریت په بهرني سیاست کې د افغانستان ځای مهم دی.
نوموړي په دې کتنه کې په ایران کې د افغان کډوالو او د ایران د حقابې په اړه خبرې وکړې.
ملا برادر د ایران په بلنه د شنبې په ورځ (د لړم ۱۳مه) له یوه۳۰ کسیزي پلاوي سره تهران ته ولاړ.
دا په تېرو دوو کلونو کې ایران ته د ملا برادر لومړی سفر دی.
ملا برادر مخکې د طالبانو د سیاسي دفتر د مشر په توګه تهران ته سفر کړی و.
