د طالبانو د کډوالو وزارت: له ۱۲ زرو ډېر کسان د سپین بولدک له لارې هېواد ته راستانه شوي
د طالبانو د کډوالو او بېرته ستنېدونکو چارو وزارت نن د (لړم ۱۳مه) په خپلې اېکس پاڼه لیکلي، چې له ۱۲ زرو ډېر افغانان په جبري ډول د سپين بولدک له لارې هېواد ته راستانه شوي دي.
د دغه وزارت په وینا، دغه راستنېدونکي کسان له راستنېدو وروسته ثبت او بايومټريک شوي دي.
د کندهار ولايت د سپين بولدک د راستنېدونکو د ثبت کمېټې په کار پیل کړی او د یوه راپور له مخې یې، يو زرو او ۱۳۲ کورنۍ چې ټولټال ۱۲ زره تنه کېږي، بېرته هېواد ته ستانه شوي دي.
په راپور کې راغلي، چې په دې برخه کې يو شمېر نورو کمېټو هم په کار پيل کړی او کارونه یې په سمه توګه روان دي.
د دې ترڅنګ همدا تېره ورځ پاکستاني چارواکو ویلي، چې تر دې دمه ۱۴۸۲۶۷ افغان کډوال په خپله خوښه افغانستان ته ستانه شوي دي.
یوازې د پنجشنبې په ورځ ټولټال ۱۹۳۴۴ بې اسناده کډوال د تورخم له لارې له پاکستانه اېستل شوي دي او دغه لړۍ لاهم روانه ده.
