افغانستان په کرېکټ نړیوال جام کې هالنډ ته په ماتې ور کولو نیمه پایلوبې ته نور هم نږدې شو
د کرېکټ نړیوال جام په ۳۴ سیالۍ کې نن د افغانستان کرېکټ ملي لوبډلې هالنډ ته په ۷ ویکټو ماتې ور کړه. دې سره افغانستان په نړیوال جام کې څلورم بری وګاټه او نیمه پایلوبې ته د رسېدو لپاره نور هم نږدې شو.
افغانستان په ننني بري سره خپلې نومرې اتو ته ورسولې او نیمه پایلوبې ته د تلو په جدول کې یې پنځم ځای خپل کړ.
پخواني افغان ولسمشر حامد کرزي د افغان لوبډلې په دې بریا خوشالي ښودلې او د نورو بریو هیله یې کړې ده.
د هند په لکنو ښار کې هالنډ د پچې ګټلو سره توپ وهلو ته مخه کړه، خو لومړنی لوبغاړی یې په یوه منډه د مجیب له خوا وسوځېد.
مجیب دې بري سره په یو ورځنیو لوبو کې د ویکټو شمېر سلو ته ورساوه او څلورم افغان لوبغاړی شو چې دا ویاړ لري.
وروسته د هالنډ لوبغاړي یو څه تم شول، خو بیا یې پرلپسې ویکټې له لاسه ور کړې او په ۴۷ اور کې یې د ټولو لوبغاړو سوځېدو سره ۱۷۹ منډې جوړې کړې.
افغانستان په ۳۲ اور کې د دریو ویکټو په زیان سره دا هدف پوره کړ او روان جام کې یې څلورم بری وګاټه.
افغان لوبډله کې رحمت شاه د ۵۲، ابراهیم ځدراڼ ۲۰ او رحمان الله ګوربز د لسو منډو جوړولو سره وسوځېدل.
حشمت اللله شاهدي د ۵۶ او عظمت الله عمرزی ۳۱ منډو سره ناسوځېدلي پاتې او لوبه یې ټوله کړه.
افغانستان تر دې مخکې انګلنډ، پاکستان او سریلانکا ته ماتې ور کړې او درې لوبې یې هم بایللې وې.
د کرېکټ نړیوال جام د اکټوبر پر پنځمه په هند کې پیل شوی او د نومبر تر ۱۹ به روان وي.
په دې جام کې د افغانستان، اسټرالیا، بنګله دېش، انګلنډ، هند، هالنډ، نيوزیلنډ، پاکستان، سوېلي افریقا او سریلانکا ملي لوبډلې ګډون لري.
