هند سریلانکا ته د ۳۰۲ منډو په توپیر ماته ورکړه او نیمه پای لوبې ته یې لار پېدا کړه
د کرېکټ د روان نړۍوال جام په ۳۳مه سیالۍ کې کوربه هند د سریلانکا ملي لوبډلې ته د ۳۰۲ منډو په توپیر د ماتې په ورکولو سره لومړۍ لوبډله شوه، چې د ۲۰۲۳ نړۍوال جام نیمه پایلوبې ته یې لار پېدا کړه.
د کرېکټ نړۍوال جام په ۳۳مه سیالۍ کې نن کوربه هند د سریلانکا ملي لوبډلې سره د ممبي ښار په وانکیدا لوبغالي کې ولوبیدله.
د سریلانکا لوبډلې کپتان کوشل منډیسن د پچې ګټلو سره توپ اچولو ته مخه کړه.
د هند لوبډلې د اتو ویکټو په زیان او د ۵۰ اورونو لوبولو سره ۳۵۷ منډې جوړې کړې.
د سریلانکا ملي لوبډله د هدف په تعقیب کې پاتې راغله او ماتې یې وخوړه.
هندي توپوهونکی محمد شامي د لوبې غوره لوبغاړی وټاکل شو. شامي په ۵ اورو کې د سریلانکا د لوبډلې ۵ ویکټې واخیستې او یوازې ۱۸ منډې یې مقابل ټیم ته ورکړي.
په روان نړۍوال جام کې دا د هند شپږمه سیالي وه؛ تر دې مخکې هند پنځه سیالۍ کړې او ټولې یې ګټلې دي.
