بښنې نړیوال سازمان:هېوادونه دې د افغان کډوالو کوربه توب لپاره له پاکستانه مالي ملاتړ وکړي

د بښنې نړیوال سازمان د سه شنبې په ورځ پر پاکستان غږ وکړ چې ژر تر ژره دې د افغان کډوالو اېستل ودروي. د بشري حقونو دغه سازمان د نړۍ له هېوادونو هم غوښتي چې له پاکستان سره مالي مرسته وکړي او هغو افغانانو ته چې د طالبانو له ظلمونو تښتېدلي دي پناه او ونډه ورکړي.

دغه سازمان په یوه بیان کې د پاکستان له حکومته غوښتي چې د افغان کډوالو د جبري اېستلو او د زور زیاتي د مخنیوي په ګډون خپل نړیوال قانوني مکلفیتونه پوره کړي.
د بښنې نړیوال سازمان وايي، له ۱.۴ میلیونو ډېر افغان کډوال د اېستلو له ګواښ سره مخامخ دي.
د ملګرو ملتونو د شمېرو له مخې د ۱۴۰۰ کال د زمري میاشت د طالبانو له واکمنۍ وروسته ۶۰۰ زره افغانان له افغانستانه وتلي دي.
د بښنې نړیوال سازمان د سه شنبې په ورځ په یوه بل بیان کې وویل، لکه څنګه چې افغان کډوال ایستل کیږي، کورنۍ به بې سرپناه پاتې شي او د ژمي په رارسیدو سره به د ژوند او لومړنیو خدمتونو څخه بې برخې شي.
د بښنې نړیوال سازمان وايي، د افغان کډوالو اېستل په ځانګړي ډول ښځې او نجونې د ځورونې او له بشري حقونو څخه له نورو جدي سرغړونو سره مخامخوي.
د بشري حقونو د څار اداره دا هم وايي چې د هغو ډیرو ښځو او نجونو لپاره چې له افغانستانه وتلې دي، په پاکستان کې ژوند او زده کړې کول ښايي رسمي زده کړو ته د لاسرسي یوازینی چانس وي.
دغه سازمان خبرداری ورکړی، چې افغانستان ته د ستنېدو سره به د افغان کډوالو په منځ کې خبریالان، د بشري حقونو مدافعان، ښځینه لاریون کوونکې، هنرمندان، پخواني دولتي چارواکي او امنیتي کارکوونکي د طالبانو له خوا له ځورونې، ربړونې او مرګ له ګواښ سره مخ شي.