امریکا یوشمېر افغان کډوالو ته سندونه لېږلي، چې د قضیو تر بشپړېدو به په پاکستان کې خوندي وي
د پاکستان لهخوا ناقانونه کډوالو ته د ورکړل شوي ضرب الاجل ختمېدو سره هممهاله، د امریکا د بهرنیو چارو وزارت هغو افغانانو ته یو مخیز سند استولی، چې د پناه غوښتنې لپاره یې غوښتنلیکونه منل شوي دي.
د دغه وزارت لهخوا په استول شوي برېښنا لیکونو کې راغلي، چې د پاسپورټ سره یوځای دغه سند په پاکستان کې د دوی ستونزې یو څه هوارولی شي او پولیس به له دوی سره کار و نه لري.
په برېښنا لیک کې دا هم راغلي، چې د امریکا د بهرنیو چارو وزارت په دې اړه له پاکستاني چارواکو سره خبرې هم کړې دي او دغه سندونه د پاکستان حکومت په غوښتنې دغه افغانانو ته استول شوي دي.
دمګړۍ په پاکستان کې افغانان امریکا او نورو بهرنیو هېوادونو ته د ویزو د ترلاسه کولو لپاره په تمه پاتې دي.
دغه سند په پاکستان کې مېشتو هغو افغانانو ته چې ویزې یې ختمې شوې دي، د هیلیو یو شین څراغ دی.
له دې سره به تر یوه بریده د خلکو ستونزې هوارې شي او په پاکستان کې مېشتو افغانانو د امریکا له دغه ګامه هرکلی کړی دی.
له دې سره د امریکا د بهرنیو چارو وزارت افغان کډوالو سره یوه شمېره هم شریکه کړې، چې ستونزې سره د مخېدو پرمهال به له هغې شمېرې سره اړیکه نیسي.
