د افغانستان د ازادو سیالیو لوبغاړي عبدالعظیم بدخشي د کوریا "هي جین پارک" ته ماتې ورکړه

د کډو هنرونو رزمي افغان لوبغاړي عبدالعظیم بدخشي تېره شپه د هند په اتراپردېش ایالت د نیوډا په لوبغالي کې د سیالۍ قفس ته ننوت. هغه د لوبې په سر کې لا خپل کوریایي سیال ته کلک ګوزارونه ورکړل.

نوموړي د سیالۍ د لومړي پړاو په لومړنیو ثانیو کې د سویلي کوریا "هي جین پارک" ته د کلکو سوکونو په ورکولو سره نیک اوټ کړ او په «ایم ایم اې» سیالیو کې یې خپل یوولسم بری ثبت کړ.

بدخشي تر دې وړاندې ۱۶ ځله د ازادو مبارزو سیالۍ تر سره کړې وې، چې ۱۰ یې ګټلې او په دریو کې یې ماتې خوړلې وه. خو د تېرې شپې سیالۍ په ګټلو سره یې خپل یوولسم بری ثبت کړ.

په ازادو سیالیو کې د سوېلي کوریا د "هي جین پارک" دا څلورمه ماتې وه.

عبدالعظیم بدخشي د سوېلې اسیا د ازادو سیالیو (ایم ایم اې) کې په لومړي مقام کې ځای لري او په دې سیالۍ کې یې د دغه مقام د ساتلو او د خپلو بریو د زیاتولو هڅه وکړه.

بدخشي خپل دغه بری د افغانستان په لوېدیځ کې زلزله ځپلو ته ډالۍ کړ.