سوېلي افریقا په کرېکټ نړیوال جام کې پاکستان ته ماته ور کړه

د کرېکټ نړیوال جام ۲۶ سیالۍ کې نن سوېلي افریقا په یوې ویکټې سره پاکستان ته ماتې ور کړه. پاکستان د کوربه هند د چینای ښار په چدم برم لوبغالي کې د پچې ګټلو سره توپ وهلو ته مخه کړه، خو تر ۴۶.۲ اور پورې یې ټول لوبغاړي د ۲۷۰ منډو په جوړلو سره وسوځېدل.

د پاکستان لوبډلې ته پیل هم مناسب نه و او د ۳۸ منډو جوړولو سره یې دوه لومړني لوبغاړي امام الحق او عبدالله شفیق وسوځېدل.

پاکستان د سوېلي افریقا په مقابل کې په خورا احتیاط او پلان سره توپ واچاوه، خو بیا هم مقابل لوري د یوه لوبغاړي لرلو سره ۴۷.۲ اور کې ټاکلی هدف پوره او لوبه یې وګټله.

سوېلي افریقا سږني جام کې له نن سره شپږ لوبې کړې چې پنځه یې ګتلې او یوه یې بایللې ده، خو پاکستان له نن سره په شپږو لوبو کې یوازې دوه ګټلې دي.

پاکستان ته په نننۍ ماتې سره نیمه پایلوبې ته وتل هم سخت شول.