په کرېکټ نړیوال جام کې نن پاکستان او سوېلي افریقا سره لوبېږي

د کرېکټ نړیوال جام ۲۶ سیالۍ کې نن د پاکستان لوبډله د سوېلي افریقا کرېکټ ملي لوبډلې سره سیالي لري. پاکستان د پچې ګټلو سره توپ وهلو ته مخه کړه، خو د ۳۸ منډو جوړولو سره یې دوه لومړني لوبغاړي امام الحق او عبدالله شفیق وسوځېدل.

دا لوبه د کوربه هند د چینای ښار په چدم برم لوبغالي کې روانه ده.

د کرېکټ نړیوال جام د اکټوبر پر پنځمه په هند کې پیل شوی او د نومبر تر ۱۹ به روان وي.

په دې جام کې د افغانستان، اسټرالیا، بنګله دېش، انګلنډ، هند، هالنډ، نيوزیلنډ، پاکستان، سوېلي افریقا او سریلانکا ملي لوبډلې ګډون لري.