طالبانو د کډوالو ستونزو ته د رسېدنې په موخه ۳۱ کسیز کمېسیون جوړ کړی
د طالبانو د ویاند ذبیح الله مجاهد د پاکستان او نورو هېوادونو څخه په جبري توګه د را ویستونکو افغان کډوالو ستونزو ته د رسېدنې لپاره د یوه کمېسیون د جوړېدو خبر ورکړی.
د طالبانو ویاند ذبیح الله مجاهد د پنجشنبې په ورځ (د لړم په ۴مه) د یوې اعلامیې په خپرولو سره ویلي: «د پاکستان او نورو هېوادونو څخه په جبري توګه د را ویستونکو افغان کډوالو ستونزو ته د رسېدنې په موخه د طالبانو د رییس لوزرا مرستیال مولوي عبدالسلام حنفي په مشري ۳۱ کسیزه عالي کمېسیون جوړ شو».
اعلامیه کې راغلي، چې د لومړیو خدماتو وړاندې کولو په موخه یې په ۸ فصلونو او ۳۱ مادو کې کړنلاره توشیح او د یادې کړنلارې د تطبیق لپاره یې یوه دارالانشاء او ۱۲ کمېټې منظورې کړې.
یادې کمېتې به د کډوالو تثبیت، تشخیص، انتقال، لومړني او صحي خدمات او موقت پنډغالي برابروي او په ځانګړې توګه سوداګرو او صنعتکارانو ته د یوه طرزالعمل له مخې خاصې اسانتیاوې په نظر کې نیولې دي.
له نورو هېوادونو څخه د افغان کډوالو راستنېدل ورځ تر بلې مخ په ډېرېدو دي.
د چهارشنبې په ورځ (د لړم په ۳مه)له ۵۰۰۰ زیات افغان کډوال له ایران او پاکستانه هېواد ته ستانه شوي دي.
د طالبانو د کډوالو او راستنېدونکو چارو وزارت په خبر پاڼه کې راغلي، چې ۵۱۷۶ تنه افغان کډوال د اسلام کلا او تورخم له پولو راوښتي چې ډېر شمېر یې په جبري توګه راشړل شوي دي.
د یو بل خبر له مخې؛ ۱۵۸۵ تنه نور کډوال له پاکستانه د سپین بولدک پر پوله را اړول شوي، چې ۲۷۶ کورنۍ کېږي، دغه کورنۍ هم د خوراکي او غیر خوراکي توکو د تر لاسه کولو لپاره نړۍوالو ادارو ته ورپېژندل شوې دي.
د پاکستان حکومت ناقانونه افغان کډوالو ته د نومبر تر لومړې نېټې وخت ورکړی چې له پاکستانه ووځي.
